urduwala.com

Dil~Dillagi~Soz : Ashaa'r

Contributed by Users or Collected From Internet

dil
dil hii to hai na saNg-o-Khisht dard se bhar na aaye kyoN
royeNge ham hazaar baar ko_ii hameN sataaye kyoN
[Mirza Ghalib]

dil-e-naadaaN tujhe huaa kyaa hai
aaKhir is dard  kii dawaa kyaa hai
[Mirza Ghalib]

dil kii haqeeqat arsh kii azamat sab kuchh hai maaloom hameN
sair rahii hai aksar apanii in paakeezaa makaanoN meN
[Mir Taqi Mir]

bahatar to hai yahii ke na duniyaa se dil lage
par kyaa kareN jo kaam na bedillagii chale
[Zauq]

phirate huye kisii kii nazar dekhate rahe
dil Khoon ho rahaa thaa magar dekhate rahe
[Asar Lucknavi]

ab kyaa bataaooN maiN tere milane se kyaa milaa
irfaan-e-Gam huaa mujhe dil kaa pataa milaa
[Seemab Akbarabadi]

dekh to dil ke jaaN se uThataa hai
ye dhuaaN saa kahaaN se uThataa hai
[Meer Taqi Meer]

kisii ko de ke dil ko_ii nawaa saNj-e-fuGaaN kyoN ho
na ho jab dil hii seene meN to phir mooNh meN zabaaN kyoN ho
[Ghalib]

jalaa hai jism jahaaN dil bhii jal gayaa hogaa
kuredate ho ab raakh justajoo kyaa hai
[Ghalib]

koii mere dil se poochhe tere teer-e-neemakash ko
ye Khalish kahaaN se hotii jo jigar ke paar hotaa
[Ghalib]

dil se Khayaal-e-yaar ko Taale huye to haiN
ham jaan de ke dil ko sambhaale hue to haiN
[Fani Badayuni]

kisii ke jaur-o-sitam kaa to ik bahaanaa thaa
hamaare dil ko bahar_haal TooT jaanaa thaa
[Naresh Kumar Shad]

is kaa ronaa nahiiN, kyoN tum ne kiyaa dil barbaad
is kaa Gam hai ki bahut der meN barbaad kiyaa
[Josh Malihabadi]

ek din kah leejiye jo kuchh hai dil meN aapake
ek din sun leejiye jo kuchh hamaare dil meN hai
[Josh Malihabadi]

le gayaa chhiin ke kaun aaj teraa sabr-o-qaraar
beqaraarii tujhe ai dil kabhii aisii to n thii
[Bahadurshah Zafar]

dil ko kyaa ho gayaa, Khudaa jaane
kyoN hai aisaa udaas kyaa jaane
[Daag Dehlvi]

dil le ke muft kahate haiN kuchh kaam kaa nahiiN
ulaTii shikaayateN huiiN ehasaan to gayaa
[Daag Dehlvi]

dil meN ab yooN tere bhoole hue Gam aate haiN
jaise bichhaRe hue qaabe meN sanam aate haiN
[Faiz Ahmed Faiz]

ko_ii aahaT ko_ii aawaaz ko_ii chaap nahiiN
dil kii galiyaaN baRii sunsaan hai aaye ko_ii
[Parveen Shakir]

dil naaumeed to nahiiN naakaam hii to hai
lambii hai Gam kii shaam magar shaam hii to hai
[Faiz Ahmed Faiz]

mere dil meN tuu hii tuu hai dil kii dawaa kyaa karooN
dil bhii tuu hai jaaN bhii tuu hai tujh pe fidaa kyaa karooN
[Unknown]

Disclaimer : Work that explicitly mentions Barbar Ghazipuri is Copyright Reserved. No Publication or sharing without consent is permissible. To remove/modify any part/content/shayari that infringes/violates anyone's copyright please contact UrduWala Team.