urduwala.com

Tasavvur~Khayal~Fikr : Ashaa'r

Contributed by Users or Collected From Internet

tasavvur
jii DhooNDataa hai phir vahii fursat ke raat din
baiThe raheN tasavvur-e-jaanaaN kiye hue
[Mirza Ghalib]

shaam se un ke tasavvur kaa nashaa thaa itanaa
neend aa_ii hai to aaNkhoN ne buraa maanaa hai
[Unknown]

ye hangaamaa-e-tajdiid-e-waafaa
merii afsurdaa javaanii ko raas nahiiN
maiN ne jo phool chune the tere qadamoN ke liye
un kaa dhundhalaa saa tasavvur bhii mere paas nahiiN
[Sahir Ludhianvi]


taRapeNge terii yaad meN ghabaraayeNge tanhaa
ai dost kisii taur na jee paayeNge tanhaa
jeene kaa akele to tasavvur bhii nahiiN hai
ham tujh se judaa hoNge to mar jaayeNge tanhaa
[Irfan 'Abid']

thii ek shaKhs ke tasavvur se
ab wo raanaa_ii-e-Khayaal kahaaN
[Mirza Ghalib]

yooN barasatii haiN tasavvur meN puraanii yaadeN
jaise barasaat meN rim_jhim meN samaaN hotaa hai
[Qateel Shifai]

ham band kiye aaNkh tasavvur meN paRe haiN
aise meN ko_ii chham se jo aa jaaye to kyaa ho
[Riaz Khairabadi]

achchhaa hai sar_angusht-e-hinaa_ii kaa tasavvur
dil meN nazar aatii to hai ek boond lahoo kii
[Mirza Ghalib]

jo bahut door thaa aaj baahoN meN hai
jo tasavvur meN thaa vo nigaahoN meN hai
[Unknown]

kuchh nazar nahiiN aataa un ke tasavvur ke sivaa
hasarat-e-deedaar ne aaNkhoN ko andhaa kar diyaa
[Unknown]

hairaaN hue na the jo tasavvur meN bhii kabhii
tasveer ho gaye merii tasveer dekh kar
[Unknown]

phir nazar meN phool lahake dil meN phir shamayeN jaliiN
phir tasavvur ne liyaa us bazm meN jaane kaa naam
[Faiz Ahmed Faiz]

raat bhar un kaa tasavvur dil ko taRapaataa rahaa
ek naqshaa saamane aataa rahaa jaataa raahaa
[Akhtar Shirani]

mileN shaam ko aasmaaN aur zameeN
tasavvur meN mil leNge ham bhii kahiiN
[Unknown]

chale jaayiye mujh se daaman bachaakar
tasavvur se bach kar kahaaN jaayiyegaa
[Unknown]

terii yaad hai yaa teraa tasavvur
kabhii 'Daag' ko ham ne tanhaa na dekhaa
[Daag Dehlvi]

tasavvur meN udhar vo aa rahe haiN
idhar dil hai ki baiThaa jaa rahaa hai
[Sirajul Hasan Siraj]

tuu yaad aaye tere jaur-o-sitam phir bhii na yaad aaye
tasavvur meN ye maasoomii baRii mushkil se aatii hai
[Firaq Gorakhpuri]

do ghaRii dil ke bahalane kaa sahaaraa bhii gayaa
liijiye aaj tasavvur meN bhii tanhaa_ii hai
[Manzar Lucknavi]

ai zauq-e-nazaaraa kyaa kahiye nazaroN meN ko_ii soorat hii nahiiN
ai zauq-e-tasavvur kyaa kiije ham soorat-e-jaanaaN bhool gaye
[Majaz]

toone dekhii hai wo peshaanii wo rukhsaar wo hoNTh
zindagii un ke tasavvur meN guzaarii ham ne
[Faiz Ahmed Faiz]

un kaa zikr un kaa tasavvur un kii yaad
kaT rahii hai zindagii aaraam se
[Mahashar Badayuni]

gum neend kii aagosh meN hone nahiiN detaa
raatoN ko tasavvur teraa sone nahiiN detaa
[Arzoo Lucknawi]

khul nahiiN sakatii haiN ab aaNkheN merii
jee meN ye kis kaa tasavvur aa gayaa
[Khwaja Mir Dard]

aaNsoo nikal rahe haiN ban ke tasavvur meN phool
shaadaab ho rahaa hai gulistaan-e-aarzoo
[Akhtar Shirani]

Disclaimer : Work that explicitly mentions Barbar Ghazipuri is Copyright Reserved. No Publication or sharing without consent is permissible. To remove/modify any part/content/shayari that infringes/violates anyone's copyright please contact UrduWala Team.